იურიდიულ საკითხთა კომიტეტი სამოქმედო გეგმის შესრულების ექვსთვიან ანგარიშთან და მედიაციის საკითხებთან დაკავშირებით სამუშაო შეხვედრას მართავს

28-29 ივლისს, ყაზბეგში იურიდიულ საკითხთა კომიტეტი, ევროკავშირისა და გაეროს განვითარების პროგრამის პროექტის „ადამიანის უფლებები ყველასათვის“ ფარგლებში, კომიტეტის სამოქმედო გეგმის შესრულების ექვსთვიან ანგარიშთან და მედიაციის საკითხებთან დაკავშირებით, სამუშაო გასვლით შეხვედრას მართავს.

შეხვედრა იურიდიულ საკითხთა კომიტეტის თავმჯდომარემ, ეკა ბესელიამ და ევროკავშირისა და გაეროს ერთობლივი პროგრამის ხელმძღვანელმა, რუსუდან ტუშურმა გახსნეს.

დღეს შეხვედრის მონაწილეებმა მედიაციის საკითხებზე იმსჯელეს, კერძოდ: ზოგადად, მედიაციის განვითარებაზე საქართველოში; სასამართლო მედიაციის დღევანდელობასა და სამომავლო პერსპექტივებზე; მედიაციის რეგულირების საერთაშორისო მოდელებზე და მედიაციის შესახებ კანონის პროექტის მნიშვნელოვან ასპექტებზე.

ხვალ სამუშაო შეხვედრის მონაწილეები განიხილავენ:

  • იურიდიულ საკითხთა კომიტეტის საკანონმდებლო საქმიანობის სამოქმედო გეგმის შესრულების ანგარიშს, რომელსაც იურიდიულ საკითხთა კომიტეტის თავმჯდომარე ეკა ბესელია წარადგენს;
  • იურიდიულ საკითხთა კომიტეტში მოქალაქეთა მომართვიანობის თაობაზე ანგარიშს, რის თაობაზეც იურიდიულ საკითხთა კომიტეტის თავმჯდომარის მოადგილე დავით მათიკაშვილი ისაუბრებს;
  • იურიდიულ საკითხთა კომიტეტის გამჭვირვალობის, კომუნიკაციისა და ორგანიზაციული საქმიანობის სამოქმედო გეგმის შესრულების ანგარიშს.

იურიდიულ საკითხთა კომიტეტის თავმჯდომარის, ეკა ბესელიას განცხადებით, კომიტეტს ყველაზე მაღალი აქტივობა აქვს და სხვასხვა ფორმატში კომიტეტის საქმიანობის განხილვა ღიაობის და ანგარიშვალდებულების ძალიან კარგი სტანდარტია. მისი თქმით, მედიაციის ახალი პროექტი, რომელსაც მთავრობა ამზადებს, მალე პარლამენტში შემოვა.

„ევროკავშირი და გაეროს განვითარების პროგრამა არიან ჩვენი ძალიან კარგი და დიდი ხნის პარტნიორები. ჩვენ დღეს გვაქვს მედიაციის ახალ პროექტთან დაკავშირებით დისკუსია. ეს არის ახალი პროექტი, რომელიც მზადდება მთავრობაში და მალე შემოვა პარლამენტში. ამავე დროს, ჩვენ კომიტეტის სამოქმედო გეგმის შესრულების ექვსთვიანი ანგარიშის შიდა განხილვას ვაწყობთ. ჩვენ გვაქვს სამოქმედო გეგმა და სტრატეგია და პერიოდულად ვამოწმებთ როგორ ვასრულებთ სამოქმედი გეგმას, ეს ახალი სტანდარტია. კომიტეტს აქვს ძალიან კარგი დინამიკა, აქვს ყველაზე მაღალი აქტივობა, ძალიან საინტერესო ახალი და ინოვაციური ფორმატები საზოგადოებასთან ურთიერთობის და კომუნიკაციის, ახალი პროექტები, კანონები, რომელსაც ვიღებთ ხალხისთვის, ასევე იურიდიული ცნობიერების ამაღლების კამპანია. ჩვენ გვქონდა მართლა ძალიან მაღალი აქტივობა. კომიტეტმა ამ ექვს თვეში 58 პროექტი მოამზადა და ვაპირებთ, რომ ინტენსიურად მოხდეს ასეთი ტიპის განხილვები როგორც შიგნით, ასევე გასვლით ფორმატში, რომელიც არის ღიაობის და ანგარიშვალდებულების ძალიან კარგი სტანდარტი“, -აღნიშნა ეკა ბესელიამ.

იურიდიულ საკითხთა კომიტეტის თავმჯდომარის მოადგილის, დავით მათიკაშვილის განცხადებით, მედიაციის ინსტიტუტის განვითარება ხელს შეუწყობს სასამართლოების განტვირთვას სამოქალაქო დავებთან მიმართებაში.

„მედიაცია არის ძალიან მნიშვნელოვანი ინსტიტუტი. ჩვენ, ყველამ კარგად ვიცით, რომ სასამართლო სისტემა, ზოგადად, გადატვირთულია. სამოქალაქო კუთხით არის ძალიან ბევრი სარჩელი, ამიტომ ვცდილობთ მხარი დავუჭიროთ ამ ინსტიტუტს იმისთვის, რომ განიტვირთოს სასამართლო და ბევრი სამოქალაქო დავა კონკრეტულ საკითხებთან მიმართებაში ჯერ იყოს მედიაციის ჭრილში განხილვადი, ხოლო შემდეგ იყოს, უკვე სასამართლო სისტემაში გადანაცვლებადი, თუ კი ეს მედიაციაში ვერ დასრულდება. ამიტომ, ეს ამ მხრივ ძალიან მნიშვნელოვანი და საინტერესო შეხვედრაა.

ხვალ გვექნება ჩვენი ექვსთვიანი ანგარიშის პრეზენტაცია, რომელიც ასახავს იურიდიულ საკითხთა კომიტეტის მიერ ბოლო ექვსი თვის განმავლობაში გაკეთებულ საქმეებს ყველა იმ მიმართულებით, რაც იურიდულ საკითხთა კომიტეტს გააჩნია“, – განაცხადა დავით მათიკაშვილმა.

ღონისძიებაში მონაწილეობას იღებენ: იურიდიულ საკითხთა კომიტეტის თავმჯდომარე, ეკა ბესელია, კომიტეტის თავმჯდომარის მოადგილე, დავით მათიკაშვილი, კომიტეტის წევრები და აპარატის თანამშრომლები, აგრეთვე ევროკავშირისა და გაეროს განვითარების პროგრამის პროექტის „ადამიანის უფლებები ყველასათვის“ წარმომადგენლები და მოწვეული ექსპერტები.

საქართველოს პარლამენტის იურიდიულ საკითხთა კომიტეტის ხელშეწყობა ევროკავშირისა და გაეროს განვითარების პროგრამის (UNDP) უფრო ფართო ინიციატივის „ადამიანის უფლებები ყველასათვის“ ერთ-ერთი მიმართულებაა. სამწლიანი პროგრამა, რომლის ბიუჯეტი 4 მილიონ ევროს აღემატება, ხელს უწყობს ადამიანის უფლებების დაცვის ეროვნული სტრატეგიისა და სამოქმედო გეგმის განხორციელებას.

 

comments

ვაკო კუპრაშვილი

საინფორმაციო ანალიტიკური სააგენტო "INFO NEWS"-ის ჟურნალისტი

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

Seo wordpress plugin by www.seowizard.org.