2020 წლის 31 ოქტომბრის არჩევნებს ოპოზიცია არალეგიტიმურად აცხადებს. ოპოზიციის წარმომადგენლები დეპუტატის მანდატზე უარს ამბობენ, თუმცა მათი ნაწილი უარს არ ამბობს იმ დაფინანსებაზე, რომელიც პარლამენტში მოხვედრილ პარტიებზე ბიუჯეტშია გათვალისწინებული.
ეს თანხა ოპოზიცური პარტიებისთვის, ჯამში 31 მილიონ ლარზე მეტია. ანუ ოპოზიციის ერთი ნაწილისთვის „გაყალბებული არჩევნებით“ მოპოვებული მანდატი მიუღებელია, თუმცა იმავე „გაყალბებული არჩევნებით“ მოპოვებული დაფინანსება მისაღები.
პოლიტიკურ წრეებში არ გამორიცხავენ, რომ მმართველმა გუნდმა ბოიკოტის რეჟიმში მყოფ პარტიებს საბიუჯეტო დაფინანსებაც შეუწყვიტოს, მით უმეტეს, რომ უახლოეს წარსულში მსგავსი პრეცედენტი ერთხელ უკვე გვქონდა. ეს მაშინ, როცა მიხეილ სააკაშვილის გუნდმა 2008 საპარლამენტო არჩევნების შემდეგ დაფინანსება შეუწყვიტა იმ პოლიტკურ პარტიებს, რომლებმაც პარლამენტში შესვლაზე უარი თქვეს და მანდატები საჯაროდ დაჭრეს.
2008 წლის 15 ივლისს პარლამენტმა 86 ხმით 11-ის წინააღმდეგ საბოლოო მოსმენით დაუჭირა მხარი პავლე კუბლაშვილის, მურთაზ ზოდელავას და ჩიორა თაქთაქიშვილის მიერ მომზადებულ კანონპროექტს, რომლის მიხედვითაც, ბოიკოტის რეჟიმში მყოფ პარტიებს საბიუჯეტო დაფინანსება შეუწყდათ.
საკანონმდებლო ცვლილებებს ხელი მოაწერა საქართველოს მაშინდელმა პრეზიდენტმა მიხეილ სააკაშვილმა, რის შემდეგაც დაფინანსება შეუწყდათ: ახალი მემარჯვენეებს, ეროვნული ფორუმს, თავისუფლებას, მოძრაობა ერთიანი საქართველოსთვის, საქართველოს გზას და ხალხის პარტიას, რომელთაც გაერთიანებული ოპოზიციის ფარგლებში ამომრჩეველთა 18%-მდე მხარდაჭერა მიიღეს.
აღსანიშნავია, რომ სააკაშვილის გუნდმა დაფინანსება შეუნარჩუნა ლეიბორისტულ პარტიას, რომელიც ფორმალურად საპარლამენტო პარტიად დარჩა, მიუხედავად იმისა, რომ პარტიის ოთხი წარმომადგენელი, მათ შორის პარტიის ლიდერი შალვა ნათელაშვილი, პარლამენტის სხდომებში მონაწილეობას არ იღებდა.
წინა ხელისუფლების ერთ-ერთი მაღალჩინისანი, თბილისის ყოფილი მერი გიგი უგულავა დღეს თავს არიდებს კითხვას – რატომ შეუწყდათ დაფინანსება 2008 წელს ბოიკოტის რეჟიმში მყოფ პარტიებს და თუკი მაშინ ეს გადაწყვეტილება სამართლიანი იყო, რატომ იქნება იგივე გადაწყვეტილება დღეს უსამართლო?
ვნახოთ, რას ამბობს გიგი უგულავა ჟურნალისტების მიერ დასმულ ამ კითხვაზე:
