“ქართული ოცნების” მიერ დარღვეული პირობა ევროსტრუქტურების კონკრეტულ დოკუმენტებში უკვე აისახა და შესაძლოა, საფრთხეს ქვეყნის ევროინტეგრაციის ტემპებსაც უქმნიდეს. ასოცირების შეთანხმების შესრულების თემაზე მომზადებული ანგარიშის პროექტი მწვავეა და ტექსტის კიდევ უფრო დამძიმებას ელოდებიან სპეციალისტები.
შეთანხმების შესრულების აუცილებლობასთან ერთად, დოკუმენტში შეშფოთებაა გამოხატული ოპოზიციონერი პოლიტიკოსების წინააღმდეგ დაწყებული საქმეების გამო. ხელისუფლება ანგარიშზე საუბარს გაურბის, ის, ვინც დოკუმენტს აფასებს, ამბობს, რომ მოწოდებები უმკაცრესია და ტყუილის პატიებას “ქართული ოცნებისთვის” არავინ აპირებს.
დოკუმენტი, რომელსაც 19 მაისს საგარეო კომიტეტზე, შემდეგ კი ევროპარლამენტის პლენარულ სხდომაზე განიხილავენ საქართველოს მიერ ასოცირების ხელშეკრულების შესრულებას ეხება. ტექსტის ავტორი საქართველოს საკითხებზე მომხსენებელი დეპუტატი სვენ მიქსერია. ის საქართველოში მარტში უნდა ჩამოსულიყო, მაგრამ პანდემიის გამო ვერ მოახერხა. თუმცა ანგარიში მაინც მოამზადა და თან, საკმაოდ კრიტიკული. ანგარიშში მოხვდა ისეთი პოლიტიკური საკითხები, როგორიცაა 8 მარტის შეთანხმება, პოლიტიკოსების წინააღმდეგ დაწყებული გამოძიებები და მართლმსაჯულების ხარვეზები.
მთავარი ტესტი არჩევნებია. არასამთავრობო ორგანიზაციების წევრების აზრით, საერთაშორისო პარტნიორები “ქართულ ოცნებას” პირობის მეორედ დარღვევას აღარ აპატიებენ.
საერთაშორისო ურთიერთობების სპეციალისტები არ გამორიცხავენ, რომ თუ მმართველი გუნდი ვალდებულებებს არ შეასრულებს, ანგარიში დაკორექტირდება და კიდევ უფრო გამწვავდება.
ასოცირების შეთანხმების შესრულების ანგარიში და თანმდევი დებატები ერთადერთი მექანიზმი არაა, რა დროსაც ევროპარლამენტარები საქართველოზე იმსჯელებენ. მომავალ სესიაზე საქართველოს შესახებ სამი დისკუსიაა დაგეგმილი. მწვავე განცხადებების ფონზე ევროდეპუტატების დებატები კიდევ უფრო კრიტიკული შეიძლება იყოს, მმართველი გუნდი კი ანგარიშის ტექსტს ამ დრომდე არ გამოხმაურებია.