მინისტრმა უკან დააბრუნა “შეჭმული” საწოლების ნაწილი და ახლა “ალიას” კითხვაა – ქალბატონო მინისტრო, ვინ “შეჭამა” 840 საწოლი?

ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი ეკატერინე ტიკარაძე ლაბორატორიული ჯგუფის წარმომადგენლებსა და იმ კლინიკების ხელმძღვანელებს შეხვდა, რომლებიც СOVID-19-ის მართვაში არიან ჩართულები. 

შეხვედრის მთავარი თემა სამედიცინო დაწესებულებებში საწოლფონდის მობილიზება იყო, საუბარი შეეხო ვირუსის გავრცელების მეორე ტალღასთან დაკავშირებულ მოლოდინებსა და საპასუხო სტრატეგიებს. 

“დღეის მდგომარეობით, პროგრამაში ჩართული იყო 12 კლინიკა, თუმცა კლინიკების სია ფართოვდება და კოვიდის შემთხვევების მართვაში მონაწილეობას 31 კლინიკა მიიღებს. დღეის მდგომარეობით უკვე მობილიზებულია 2400- მდე საწოლი, საწოლების რაოდენობა სრულად შესაძლოა გაიზარდოს იმის მიხედვით, თუ რა საჭიროება იქნება. მთავრობის დადგენილებით, ეპიდემიის საჭიროებებიდან გამომდინარე 3200 კოვიდ საწოლის მობილიზებაა განსაზღვრული” 

შეგახსენებთ, დღეს განცხადება გააკეთა პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ და თქვა რომ უკვე ჩართული 20-ზე მეტი კლინიკა და უკვე მობილიზებულია 2400 საწოლი. მან ასევე თქვა, რომ ხელისუფლებამ ეს დრო, 5-6 თვე სწორედ აი, ამ საწოლფონდის გასაზრდელად გამოიყენა.

თუმცა, მარტში (14 მარტს) ხელისუფლება გვიმტკიცებდა რომ მას მობილიზებული აქვს 4040 საწოლი, როგორ გაზარდა 4040 საწოლი 2400 საწოლამდე მარტიდან სექტემბრამდე, რა თქმა უნდა, სასწაულია…

ფსონი იზრდება, “ალიას” წერილის შემდეგ, ჯანდაცვის სამინისტრომ კიდევ ერთხელ გაზარდა საწოლფონდი და მარტში რომ 4040 საწოლი მქონდა მობილიზებული, იმას გავზრდი 3200-მდეო, დაგვპირდა.

დაგვპირდა და გაზრდის, აუცილებლად გაზრდის 4040 საწოლს 3200 საწოლამდე, აგერ თქვენ და აგერ ჩვენ.

ასე ხდება ქვეყანაში, როცა კარგი მინისტრი გყავს, ასე სასწაულებრივად იზრდება საწოლფონდები.

დღეს ვიკითხეთ ვინ შეჭამა 1640 საწოლი, მაგრამ მას შემდეგ ჯანდაცვის მინისტრმა უკან დააბრუნა “შეჭმული” საწოლების ნაწილი და ახლა კითხვა იცვლება, ამჯერად “ალიას” კითხვაა – ქალბატონო მინისტრო, ვინ შეჭამა 840 საწოლი?

მართალია, მინისტრი ამბობს, უსიმპტომო პაციენტებს სასტუმროებში ვუმკურნალებო, მაგრამ აქვე უნდა შეგახსენოთ, რომ სინამდვილეში უსიმპტომო პაციენტებს არ მკურნალობენ, აკვირდებიან, ამიტომ, თუ სასტუმროში ერთ ღამეში გადახდილი თანხა, კლინიკისთვის ერთ ღამეში გადახდილი თანხის ტოლფასია, არაფერიც მოხდება, გადაიყვანეთ სასტუმროებში და იქ დააკვირდით, მაგრამ სამედიცინო პერსონალს როგორ გაანაწილებთ კლინიკებსა და სასტუმროებს შორის, უცნობია და გარდა ამისა, მეეჭვება სასტუმრო კლინიკის საფასურად იპოვნოთ.

შეგახსენებთ ამასობაში, რომ ქვეყნის პირველ კლინიკაში, ინფექციურ საავადმყოფოში წყალი ისევ ჩადის, სახელმწიფომ ვერ უზრუნველჰყო “ავერსთან” შუამავლობა ეკისრა და შენობა გადაეხურა, ვერც დაპირებული ახალი შენობა მისცა კლინიკას!

ალია

0Shares
infonews.ge

კომენტარები

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

This site uses Akismet to reduce spam. Learn how your comment data is processed.