პოლიტპატიმრები – დასავლეთის რეაქცია შეთანხმების შეუსრულებლობაზე

რვა მარტის ორპუნქტიანი შეთანხმების შეუსრულებლობამ, შესაძლოა, საქართველოსთვის მძიმე შედეგები გამოიწვიოს. მას შემდეგ, რაც ხელისუფლებამ პირდაპირ თქვა რომ პოლიტპატიმრების გათავისუფლებას არ აპირებს, რადგან საქართველოში პოლიტიკური პატიმრები არ არსებობენ, ევროპიდან და აშშ-დან მწვავე კრიტიკის ტალღა აგორდა.

საქართველოს ხელისუფლების სახელზე უმწვავესი წერილები მოდის ევროპარლამენტიდან და კონგრესიდან, სადაც დასავლელი პარტნიორები აღარ ერიდებიან ტერმინის – პოლიტიკური პატიმარი – გამოყენებას. გარდა ამისა, ევროპარლამენტიდან “ოცნების” ხელისუფლებას ახსენებენ, რომ ფულადი დახმარებების მიღება, რომელიც ქვეყანას კორონაკრიზისიდან გამოსასვლელად საციცოცხლოდ სჭირდება, შეთანხმების პირობების სრულად შესრულებაზეა დამოკიდებული.

ხელისუფლების წარმომადგენლების განცხადებას რომ რვა მარტის შეთანხმება არ მოიცავდა პოლიტპატიმრების გათავისუფლებას, დასავლელი პარტნიორების გამოხმაურებები მოჰყვა.

განცხადებები გაავრცელეს აშშ-სა და ევროკავშირის წარმომადგენლობებმა საქართველოში

აშშ-სა და ევროკავშირის წარმომადგენლობებმა საქართველოში, არჩილ თალაკვაძის განცხადების საპასუხოდ, მმართველ პარტიას შეახსენეს, რომ განხილვების შინაარსის გასაჯაროება მათი როლი არ არის.

„ჩვენ აღვნიშნავთ, რომ შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, რაც სასამართლო სისტემაში პოლიტიკურ ჩარევას ჰგავს. ჩვენ მოვუწოდებთ ყველა მხარეს, სრულად დაიცვან შეთანხმების ორივე ნაწილი, რათა ის წარმატებით განხორციელდეს“, – ნათქვამია გავრცელებულ განცხადებაში.

კონგრესმენი ადამ კინზინგერი

შეთანხმების დარღვევას რამდენიმე საათში გამოეხმაურა ამერიკელი კონგრესმენი ადამ კიზინგერიც და “ტვიტერზე” დაწერა, რომ რვა მარტის დოკუმენტი ისტორიული მნიშვნელობისაა და ის უნდა შესრულდეს.

გადამწყვეტი მნიშვნელობისაა შეთანხმების იმპლემენტაცია, რომ დასრულდეს ეს ამბავი და წინ წავიწიოთ, – წერს კინზინგერი “ტვიტერზე”.

სენატის საგარეო კომიტეტის თავმჯდომარე ჯიმ რიში

“ქართულ ოცნებას” მორიგი გაფრთხილება მისცა სენატის საგარეო ურთიერთობათა კომიტეტის თავმჯდომარემაც. ჯიმ რიშმა საკუთარ განცხადებაში ტერმინი – პოლიტიკური პატიმრები გამოიყენა.

მე მოველი საქართველოს პოლიტიკური პარტიებისგან, რომ სრულად შეასრულონ მარტის შეთანხმება, მათ შორის, პოლიტიკური პატიმრების გათავისუფლება და იყოს პროგრესი ახალი საარჩევნო სისტემისკენ, – წერს სენატორი “ტვიტერზე”.

ევრონესტის თანათავმჯდომარე ანდრიუს კუბილიუსი

“ქართული ოცნების” მისამართით მკაცრი გაფრთხილებები მოდის ევროპარლამენტიდანაც. ვრცელი განცხადება გაავრცელა ევრონესტის თანათავმჯდომარემ და ლიეტუველმა ევროპარლამენტარმა ანდრიუს კუბილიუსმა და “ოცნების” ხელისუფლებას ფულადი დახმარებები შეახსენა.

ევროკავშირმა საქართველოს დასახმარებლად 500 000 000 ევრო გამოუყო, თუმცა დახმარების ნაწილი მიბმული იქნება კონკრეტულ პირობებთან, კერძოდ საქართველოში მიმდინარე რეფორმების გატარებასთან, რომელიც კავშირშია კანონის უზენაესობასთან, სასამართლო სისტემასთან და საარჩევნო გარემოსთან, ჩვენ ყველამ ერთად უნდა ვიმუშაოთ ურთიერთნდობის ატმოსფეროში, ეს ნდობა შეიძლება დაეფუძნოს მხოლოდ აღებული ვალდებულებებისა და დაპირებების შესრულებას, მათ შორის 2020 წლის რვა მარტის შეთანხმების შესრულებას, – წერს “ტვიტერზე” კუბილიუსი.

პოლონელი ევროპარლამენტარი ანდჟეი ჰალიცკი

რვა მარტის შეთანხმებას “ტვიტერზე” გამოეხმაურა და პოლიტიკური პატიმრების გათავისუფლებისკენ მოუწოდა საქართველოს ხელისუფლებას ევროპარლამენტარმა ჰალიცკიმაც. ამბობს, რომ თუ არ გათავისუფლდებიან პატიმრები, ეს ავტომატურად ნიშნავს შეთანხმების დარღვევას, რაც საფრთხეს შეუქმნის სამართლიან არჩევნებს – “გამოუშვით პოლიტპატიმრები” – წერს ჰალიცკი.

გერმანელი დეპუტატი ვიოლა ვონ კრამერი

გერმანელი დეპუტატის, ვიოლა ვონ კრავონის საკმაოდ ხისტი და მკაცრი განცხადება გამოქვეყნდა ევროპარლამენტის გვერდზე. აღსანიშნავია, რომ ვიოლა ვონ კრამერი ივანიშვილის გუნდის დიდი მხარდამჭერი იყო. ის წერს, რომ კიდევ ერთი დარღვეული პირობა საბოლოოდ აქცევს “ქართულ ოცნებას” არასაიმედო და უპასუხისმგებლო პარტნიორად.

“ფრიდომ ჰაუსის” ანგარიშმა დაადასტურა, რომ სასამართლო სისტემა საქართველოში არ არის პოლიტიკური მოტივაციებისგან თავისუფალი. დაუშვებელი და უბრალოდ ცუდი ტონია “ქართული ოცნების” მიერ ფასილიტატორი დიპლომატების შიდა კონფრონტაციაში ჩათრევის მცდელობა. დიპლომატებმა, საქართველოს ინტერესებიდან გამომდინარე, გასწიეს უდიდესი სამსახური, იშუამდგომლეს რა, რვა მარტის შეთანხმების მისაღწევად.

ორივე მხარეს უნდა ახსოვდეს, განსაკუთრებით მეტი ძალაუფლების მხარეს, რომ საარჩევნო რეფორმა და კანონის უზენაესობა უმნიშვნელოვანესი საფეხურია უფრო დემოკრატიული, უფრო ევროპული საქართველოსთვის. ევროკავშირს არ შეუძლია და თვალს ვერ დახუჭავს ამ ორ სფეროში უკან დახეულ ნაბიჯებზე”, – ნათქვამია განცხადებაში.

მარკეტა გრეგოროვა

ევროპარლამენტარი და მწვანეთა პარტიის წარმომადგენელი, მარკეტა გრეგოროვა, რვა მარტის შეთანხმების შესრულებაზე მთელ პასუხისმგებლობას “ქართულ ოცნებას” აკისრებს.

“ორი თვის წინ, რვა მარტს, როდესაც შეთანხმება შედგა, დიპლომატიური კორპუსისგან ინფორმაცია მივიღეთ, რომ შეთანხმება იყო რამდენიმე პუნქტიანი, მათ შორის, საუბარი იყო პოლიტიკური პატიმრების გათავისუფლებაზე, რაც პირდაპირ უკავშირდებოდა აქციებს, ამიტომ ჩვენ ეს ძალიან მნიშვნელოვანად მივიჩნიეთ.

ახლა კი მოულოდნელად ვიგებთ, რომ მთავრობა ამტკიცებს, რომ ეს შეთანხმების ნაწილი არასდროს ყოფილა. ეს მოცემულობა ძალიან დამაბნეველია. არ შეიძლება შეთანხმების მაგიდიდან მოისროლო ის ფურცელი, სადაც პოლიტიკურ პატიმრებზეა საუბარი, ისინი აუცილებლად უნდა გათავისუფლდნენ. როგორც არ უნდა მოიქცეს ოპოზიცია, პასუხისმგებლობა “ქართულ ოცნებას” ეკისრება, რადგან მათ აქვთ უმრავლესობა”, – ამბობს ევროპარლამენტარი მარკეტა გრეგორევა.

პოლონელი ევროპარლამენტარი ანა ფოტიკა

ევროპარლამენტარი ანა ფოტიკა “ოცნების” ხელისუფლებას აფრთხილებს, რომ კორონავირუსის პირობებშიც კი ისინი ქვეყანაში მიმდინარე პოლიტიკურ პროცესებს ყურადღებით აკვირდებიან.

მე ვიცი, რომ ევროპელი პოლიტიკოსების ჯგუფმა საქართველოში მოინახულა პოლიტიკური პატიმრები. ასეთი რამდენიმე შეხვედრა შედგა, ამიტომ უგულავაც და მის მსგავსად სხვებიც უნდა გათავისუფლედნენ.. უნდა ვთქვა, რომ ძალიან უკმაყოფილო ვიყავი იმ ტონით, რომელიც ძალიან საპატივცემულო პოლიტიკოსების, ანდრიუს კუბილიუსის პასუხად მოვისმინეთ. სულ მცირე, ეს პასუხი არადიპლომატიური და არამეგობრული იყო, – ამბობს ფოტიკა.

გერმანელი ევროპარლამენტარი მიქაელ გალერი

“ისინი ტესტავენ, საქართველოს დასავლეთელი მეგობრები ელოდებიან თუ არა პოლიტიკური პატიმრების გათავისუფლებას. დიახ, ველოდებით. ეს აუცილებელია, რომ არჩევნები იყოს სამართლიანი და თავისუფალი”, – წერს გალერი.

გაეროს მუდმივი წარმომადგენელი საქართველოში, ლუისა ვინტონი

გაეროს მუდმივმა წარმომადგენელმა საქართველოში, ლუისა ვინტონიმა აღნიშნა, რომ რვა მარტის შეთანხმება ორივე მხარემ უნდა შეასრულოს.

„ძალიან მნიშვნელოვანია, რომ შეთანხმება შესრულდეს. ეს პოლიტიკური პარტიების პასუხისმგებლობაა. ამ შეთანხმებამ უნდა მოიტანოს მშვიდობიანი ატმოსფერო ძალიან დაძაბულ პოლიტიკურ ვითარებაში, ამიტომ პირობების შესრულება მნიშვნელოვანია, – ამბობს ვინტონი.

“მთავარი”

0Shares
infonews.ge

კომენტარები

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

Seo wordpress plugin by www.seowizard.org.