რატომ ჩავარდა ტენდერები მასიურად და რამდენით გაძვირდება ტრანსპორტი და პური?

ბოლო ორი თვის განმავლობაში, მუნიციპალიტეტების მიერ გამოცხადებული ტენდერების უმრავლესობა ჩავარდა. შესაბამისად, ადგილობრივი თვითმმართველობის ორგანოები იძულებულნი არიან ტენდერები ახლიდან გამოაცხადონ და ასეც იქცევიან. ეს იმას ნიშნავს, რომ ინფრასტრუქტურული პროექტები აუცილებლად უნდა განხორციელდეს და პანდემიამ მას ხელი ვერ უნდა შეუშალოს. ერთი შეხედვით, ტენდერების ჩავარდნა კატასტროფა არაა, რადგან ასე ხდება ხოლმე, მაგრამ არა მასობრივად. რა გახდა მიზეზი იმისა, რომ კომპანიებმა ტენდერებში მონაწილეობაზე უარი თქვეს? ჰო, მუნიციპალიტეტების პირველი პირები განმარტავენ, რომ ეს შეზღუდვების გამო მოხდა, რომ კომპანიები სამუშაოებს ვერ დაიწყებდნენ, მაგრამ…
„რეალური მიზეზი იმისა, რომ ტენდერების 70%-ზე მეტი ჩავარდა, ფული იყო. უფრო ზუსტად, უფულობა, ანუ მუნიციპალიტეტებმა მოგების ძალიან მცირე მარჟა ჩადეს, რამაც ფირმები დააფრთხო. მილიონიან ტენდერზე რომ გიწერენ, მოგება 20 ათასი დაგრჩებაო, რისკია, იმიტომ, რომ ეს 20 ათასი შესაძლოა ისე განიავდეს გაუთვალისწინებელ ხარჯებში, ფასნამატ ინვენტარზე, რომ ვერც კი გაიგო. ახლა კი, სიტუაცია შეიცვალა, მისაღები პირობებია და ტენდერები აუცილებლად წარმატებით დასრულდება“, – გვეუბნება ჩვენი წყარო.


მისივე თქმით, ახლად გამოცხადებულ ტენდერებში არამხოლოდ მოგების თანხაა გაზრდილი, არამედ ისიცაა გათვალისწინებული, ვინ რამდენი უნდა შესწიროს წინასაარჩევნოდ მმართველ პარტიას. თანაც, ახლა გამოცხადებული ტენდერი იმას ნიშნავს, რომ ვაჭრობა დასრულდება ივნისის შუა რიცხვებში, ხელშეკრულების გაფორმებას და სხვა პროცედურებს დასჭირდება დაახლოებით სამი კვირა და ივლისში, ანუ ზედ წინასაარჩევნო კამპანიის დროს, მუშაობა გახურდება ყველგან. რაც მთავარია, ოპოზიცია ამას ვერ გააპროტესტებს, იმიტომ, რომ ყველაფერი კანონის ჩარჩოებშია მოქცეული. პარალელურად, ისიც ყველასთვის ცნობილია, რომ სკოლებისა და ბაღების მასწავლებლები, მეორე თვეა სამსახურში არ დადიან და დისტანციურ სწავლებაზე არიან გადასულები. ეს არის ადამიანთა არმია, რომელსაც ხელისუფლება მარტივად გამოიყენებს. მასწავლებლებზე ისედაც ამბობდნენ, აგიტატორების ფუნქციას ასრულებენო და ახლა, როცა საამისოდ ბევრად მეტი დრო აქვთ, უკეთესად შეასრულებენ.


თუმცა, მთავარი ახლა ეს არ არის. მთავარი ის გახლავთ, რომ ტრანსპორტზე არსებული შეზღუდვების გამო, ტრანსპორტზე ფასების გაზრდა გარდაუვალია და თანაც როგორი გარდაუვალი – ოფიციალურად, ფასი უნდა გაორმაგდეს, რადგან 20 ადგილიან სამარშრუტო ტაქსს მაქსიმუმ 10 კაცის გადაყვანის უფლება აქვს და ეს იმ პირობებში, როცა დეზინფექციის ხსნარი უნდა ასხას ყოველი რეისის შემდეგ და სხვა წესები დაიცვას, რაც მას არსებობას უძვირებს. ჯერჯერობით, საზოგადოებრივი ტრანსპორტი არ აღდგა და მოსახლეობა ამას ვერ გრძნობს, მაგრამ აუცილებლად იგრძნობს იმ შემთხვევაში, თუ ეს შეზღუდვა არ მოიხსნება. საინტერესოა მეტროს თემაც. ვინ უნდა გააკონტროლოს, რამდენი ადამიანი შეიძლება შევიდეს ერთ ვაგონში და მითუმეტეს დატვირთულ სადგურებზე? ჩვენი ინფორმაციით, სწორედ მეტროს გამო არ ხსნიან შეზღუდვებს საზოგადოებრივ ტრანსპორტზე, რადგან მეტროში შემზღუდავი მექანიზმი ვერ მოიფიქრეს.

და ერთიც – ხელისუფლებამ ვერც ამ კვირაში მოახერხა ხორბლის შემოტანის ახალი გზების მოძიება, რაც იმას ნიშნავს, რომ თუ რუსეთმა 1-ლ ივლისს ხორბლის გაყიდვის აკრძალვა არ მოხსნა, საქართველოში პური მინიმუმ 20%-ით გაძვირდება და ესეც იმ შემთხვევაში, თუ მარაგების შევსებას მაგალითად საფრანგეთიდან მოვახერხებთ. მოლაპარაკებები სწორედ ფრანგებთან მიმდინარეობს და საქმეში საქართველოს პრეზიდენტიც არის ჩართული. იმ 90%-ის შევსება, რომელიც საქართველოში სწორედ რუსეთიდან შემოდის, ძალიან, ძალიან რთული იქნება.

ანი დვალიშვილი, ალია №18

0Shares
infonews.ge

კომენტარები

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

This site uses Akismet to reduce spam. Learn how your comment data is processed.