ევროპაში აშშ-ის სამხედრო ძალების ყოფილი მეთაურის ბენ ჰოჯესის აზით, აშშ-ისა და ნატო-ს მთავარი მიზანი შავი ზღვის რეგიონში ინიციატივის ხელში ჩაგდება უნდა იყოს და არა კრემლის ქმედებებზე რეაგირება.
ამასთან, როგორც ჰოჯესი საქართველოს პირველ არხთან აცხადებს, თავად ისურვებდა, რომ საქართველომ მიიწვიოს აშშ, დიდი ბრიტანეთი და კიდევ რამდენიმე ქვეყანა, რათა მათ საქართველოში ინფრასტრუქტურა განათავსონ.
ჰოჯესი განმარტავს, რომ საუბრობს არა სამხედრო ძალების მუდმივ განთავსებაზე, არამედ როტაციული ძალებზე. რაც შეეხება ინფრასტრუქტურას, ეს შეიძლება იყოს:
- საჰაერო ოპერაციების დამხმარე ინფრასტრუქტურა: თვითმფრინავების საწვავით გამართვა;
- სახმელეთო ძალებისთვის ამუნიციისა და სხვა საჭირო რესურსების მარაგის საწყობი: ნივთების, რომელთა გამოყენებაც შესაძლებელი იქნება კრიზისის დროს ან წვრთნებისთვის.
- თუ საქართველო ანაკლიის პორტს ააშენებს, ამ შემთხვევაში, ამერიკის ფლოტის ხომალდები საქართველოში ვიზიტს უფრო ხშირად შეძლებენ.
„ეს წაახალისებდა აშშ-ს, დიდ ბრიტანეთსა და სხვა ქვეყნებს, უფრო ხშირად ჩავიდნენ საქართველოში. ასევე, ვისურვებდი, რომ თუ ამის ნებართვას საქართველო გასცემს, აშშ-ს საქართველოში გაეხსნა ბაზა, რომელსაც ვაშინგტონი გამოიყენებდა სირიაში ან ერაყში პრობლემების საპასუხოდ სამხედროების გაგზავნისას. ასეთი ბაზის საქართველოში გახსნა შეიძლება, იყოს სასარგებლო. მთავარი კი მიზანია, რომ აშშ-მა და ნატო-მ შავ ზღვაში ინიციატივა ხელში ჩაიგდონ და მუდმივად მხოლოდ კრემლის საპასუხოდ არ მოქმედებდნენ. პირიქით, კრემლს უნდა ვაიძულოთ რეაგირება ჩვენს ნაბიჯებზე. ეს არ არის პროვოკაციული ქმედება. რუსეთს პროვოცირება არ სჭირდება. რუსეთი საქართველოსა და უკრაინაში იმ პერიოდში შეიჭრა, როდესაც რუსეთის მიმართ ჩვენი მიდგომა ყველაზე რბილი იყო. ეს მას შემდეგ მოხდა, რაც ჩვენ გერმანიიდან ყველა ტანკი გავიყვანეთ. ამიტომ, რუსეთის პროვოცირებაზე არ უნდა ვინერვიულოთ“, – განცხადა ბენ ჰოჯესმა.
მისივე თქმით, მნიშვნელოვანია, რომ აშშ-ის ახალი პრეზიდენტის ადმინისტრაციამ რუსეთზე ზეწოლა გააგრძელოს და ეს გერმანიასა და საფრანგეთთან ერთად გააკეთოს.
„გერმანია არის აშშ-ის მნიშვნელოვანი მოკავშირე და ამავდროულად, ერთადერთი ქვეყანა, რომელსაც შეუძლია, ზეგავლენა მოახდინოს კრემლის ქცევაზე. აშშ-მა მჭიდროდ უნდა ითანამშრომლოს გერმანიის მთავრობასთან, რათა კრემლზე ზეწოლა შენარჩუნებული იყოს. ჩვენ ასევე უნდა წავახალისოთ საფრანგეთი, რათა პარიზმა ასევე გააგრძელოს ზეწოლა კრემლზე. მაგრამ ყველაფერი მაინც აშშ-ზეა დამოკიდებული. ბოლო ოთხი წლის განმავლობაში აშშ-ის პრეზიდენტის პოზიცია მკაფიო არ ყოფილა. მიუხედავად იმისა, რომ ტრამპმა გააფართოვა აშშ-ის წარმომადგენლობა გერმანიაში და ზოგადად, ევროპაში, მას რეალურად არასდროს დაუგმია კრემლი. იმედი მაქვს, ბაიდენის ადმინისტრაცია იმუშავებს საფრანგეთთან და გერმანიასთან, რომ მოახდინონ ზეწოლა მოსკოვზე, რათა კრემლი პატივისცემით მოეკიდოს საერთაშორისო კანონმდებლობას და სუვერენულ საზღვრებს. ჩვენ უნდა მოვახდინოთ რუსეთზე დიპლომატიური და ეკონომიკური ზეწოლა. რუსეთს პასუხი უნდა ვაგებინოთ, როდესაც ის საერთაშორისო ნორმებს არღვევს. თუ აშშ, გერმანია და საფრანგეთი ამ საკითხზე ერთად იმუშავებენ, შედეგების მიღწევა შესაძლებელი იქნება“.
