“უნიათო” ოპოზიციის “პოლიტიკური პანაშვიდი” დაიწყო – ვოლსკი-მდინარაძე-ოხანაშვილის პოლიტისტერია – ივანიშვილის “ოცნება” პანიკაშია?

საქართველოს საარჩევნო კანონმდებლობის ცვლილების პროექტთან დაკავშირებით, ეუთო-ის დემოკრატიული ინსტიტუტებისა და ადამიანის უფლებების ოფისის (ოდირი) დასკვნამ მმართველ პარტიაში ვნებათაღელვა გამოიწვია.

გავლენიანი და პრესტიჟული ორგანიზაციის დასკვნის სახელისუფლებო შეფასებები სრულ პოლიტიკურ ისტერიაში გადაიზარდა.

ნაცვლად იმისა, რომ „ქართული ოცნების“ წარმომადგნელებს ოდირის მიერ მითითებულ რეკომენდაციებზე ღიად ემსჯელათ, დაიწყეს მტკიცება, თუ როგორი „უნიათოა ოპოზიცია“.

საპარლამენტო უმრავლესობის წევრის, ანრი ოხანაშვილის განცხადებით, ოდირის დასკვნა იმის მანიშნებელია, რომ ოპოზიცია უნიათოა და ,,ტყუილსაც ვეღარ ამბობენ“.

მისი თქმით, „ტაიმერი” ჩართულია და დღეს „ნაცმოძრაობის” პოლიტიკური პანაშვიდი დაიწყო“.

„უნიათო ოპოზიციურ ჯგუფებთან გვაქვს საქმე, რომლებმაც ტყუილის სწორად გაყიდვაც ვერ ისწავლეს და ის, რომ მთელი მათი მმართველობის პერიოდში საზოგადოებას ტყუილში აცხოვრებდნენ და ფასადურ დემოკრატიას სთავაზობდნენ, იმდენად უნიათოები არიან, რომ ტყუილსაც ვეღარ ამბობენ. ეს დასკვნა არის ამის მიმანიშნებელი. თუ ისინი კარგი იურისტები არიან და კითხულობენ ტექსტს, გამოვიდნენ და საზოგადოებას უთხრან ერთი წინადადება, სად წერია, რომ მათი გადმოსახედიდან „გერმანული მოდელი“ შეესაბამება საქართველოს კონსტიტუციას. ასევე პარადოქსია ისიც, რომ საზოგადოებას ეუბნებოდნენ თითქოს „გერმანული მოდელი“ გააგზავნეს, რეალურად დამახინჯებული „გერმანული მოდელი“ გააგზავნეს, ავღანური საარჩევნო სისტემის ელემენტებით გაჯერებული”, – განაცხადა ოხანაშვილმა.

ოდირის დასკვნის შეფასება არც პარლამენტის თავმჯდომარის მოადგილე მამუკა მდინარაძეს გამორჩენია.

მისი თქმით, ეუთო/ოდირმა „ოპოზიცია ძალიან მძიმედ დატუქსა“.

მდინარაძის განცხადებით, პირველივე წუთებიდან ჩანდა, რომ ოპოზიციის წარმომადგენლები დასკვნის შესახებ მოტყუებას აპირებდნენ.

„შემდეგ გაიშალნენ ეთერებში და ასეც მოიქცნენ, დაიწყეს სპეკულირება, თითქოს არსად წერია, რომ კანონპროექტი არაკონსტიტუციურია, რაც ბუნებრივია, არც ეწერება. ეუთო/ოდირმა პირველივე ნაწილში ოპოზიცია დატუქსა და უთხრა, რომ ეუთო/ოდირი არ არის ის ადგილი, სადაც განსჯიან კონსტიტუციურობის საქმეს. ეს არის შიდა ეროვნული – სასამართლოს ანუ საკონსტიტუციო სასამართლოს პრეროგატივა.

თუ ეუთო/ოდირი გეუბნება, რომ ისინი ვერ გაარჩევენ იმ თემას, რასაც ჰქვია კონსტიტუციურობის საკითხი, მაშინ ვერც იმას დაწერენ, რომ კონსტიტუციურია და ვერც იმას დაწერენ, რომ არაკონსტიტუციურია. ამაზე მოჭიდება და საზოგადოების ამით მოტყუება, რეალურად, ძალიან დიდი სირცხვილია. ეუთო/ოდირმა ოპოზიცია ძალიან მძიმედ დატუქსა. ძალიან სამწუხაროა, შეიძლება ეს ჩემი მხრიდან, როგორც სუბიექტური ადამიანის მხრიდან, „ქართული ოცნების“ სასარგებლოდ ოპოზიციაზე რაღაც გამარჯვება იყოს, მაგრამ მეორე მხრივ, როდესაც ქვეყანაში გყავს ოპოზიცია, რომელიც ეუთო/ოდირის შეფასებით არის ძალიან არაკომპეტენტური, ეს არის ზოგადად, უხერხული“, – განაცხადა მდინარაძემ.

ვიცე-სპიკერ გია ვოლსკის განცხადებით კი, ოპოზიციის ე.წ. გერმანული მოდელის საარჩევნო სისტემა, რომელსაც ოპოზიცია მხარს უჭერდა „ძალიან დესტრუქციული და ქვეყნის სტაბილურობისთვის საშიშია“.

მისი თქმით, ოდირის დასკვნაში სწორედ ამაზეა საუბარი.

„ეს არის მთავარი თემა, რასაც ხაზს უსვამს ეუთო/ოდირის დასკვნა. აქ ნებისმიერი მანიპულაცია, ნებისმიერი სპეკულაცია არის ძალიან შორი. ჩვენი შეხვედრები, როგორც ადრე არაერთხელ აღვნიშნე, არის გამიზნული, რათა როგორმე ლოგიკა ვიპოვოთ იმაში, რასაც ჰქვია საარჩევნო სისტემა. რასაკვირველია, ოდირი აძლევს ყველას რეკომენდაციას, რომ არანაირი ცვლილება, რომელიც მოითხოვს საკონსტიტუციო ცვლილებას, არ განხორციელდეს.

ეს არის ერთ-ერთი ფუნდამენტური მოთხოვნა, ვინაიდან ქვეყნის სტაბილურობაზეა საუბარი და ამასთან დაკავშირებით არის ეს რეკომენდაციაც შემუშავებული. ჩვენ თუ ვსხდებით მოლაპარაკების მაგიდასთან, გვინდა საზოგადოებას, ჩვენს საერთაშორისო პარტნიორებს, თუნდაც ოპოზიციურ მხარეს დავანახოთ, რა გვინდა რეალურად. როდესაც შევთავაზეთ მათ პროპორციული არჩევნების სისტემა, სავსებით გულწრფელად, რაღაც კონსენსუსს მოველოდით და არა იმას, რომ თავზე დაიმხეს ქვეყანა, პრაქტიკულად აღარ დატოვეს არც ერთი კუთხე-კუნჭული, სადაც დესტაბილიზაცია არ შემოიტანეს. აქედან გამომდინარე, რეალურად შეიქმნა საფრთხე, რომ ეს სისტემა, რომელსაც ესოდენ მხარს უჭერს ოპოზიციური მხარე, არის მათ ხელში ძალიან დესტრუქციული და ქვეყნის სტაბილურობისთვის საშიში.

ამაზე კიდევ ერთი მითითება არის ეუთო/ოდირის დასკვნაში. სამართლებრივ სფეროში ვინც მუშაობს და კონსტიტუციონალისტებისათვის იქ შეკითხვა არ არსებობს, შეესაბამება თუ არა პროპორციული სისტემა არსებულ კონსტიტუციას. მაგრამ კიდევ ერთხელ ვიმეორებ, ეს არ არის მთავარი, მთავარი რეკომენდაცია არის, რომ წარმომადგენლობითობა უზრუნველყოფილი უნდა იყოს გამარჯვებული პოლიტიკური ძალისთვის უმრავლესობისა და სტაბილური მთავრობის შექმნის გარანტიით. აი, ეს გარანტია არ არის იმ წინადადებებში, რასაც ჩვენი ოპონენტები გვთავაზობენ“, – განაცხადა ვოლსკიმ.

 ანა ქორჩილავა

https://2020news.ge

კომენტარები

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

Seo wordpress plugin by www.seowizard.org.