8 მარტის შეთანხმების შეუსრულებლობის შემთხვევაში, ივანიშვილის ოცნების ხელისუფლებას ევროპარლამენტისგან მწვავე რეზოლუცია ელის

უმწვავესი კრიტიკის უწყვეტი კასკადი დაატყდა თავს „ქართულ ოცნებას“. მმართველი პარტია ტყუილში ოპოზიციის შემდეგ, ახლა მაღალი რანგის ევროპელმა პოლიტიკოსებმა ამხილეს. გავლენიანი და წინა ხელისუფლების მიმართაც კრიტიკულად განწყობილი ევროპარლამენტარები აცხადებენ, რომ ბიძინა ივანიშვილი პარტნიორების მოთმინებას ტესტავს. 

თბილისიდან ახსნა-განმარტების სახით ბრიუსელში გაგზავნილ წერილზე საპასუხოდ, ხელისუფლებას ევროპელი ლიდერები ფაქტობრივად დამარცვლით უხნიან, რომ პოლიტპატიმრები უნდა გაათავისუფლოს. წინააღმდეგ შემთხვევაში, ბიძინა ივანიშვილის „ქართული ოცნება“ თავს არასაიმედო და უპასუხისმგებლო პარტნიორად საბოლოოდ დაიმკვიდრებს.

პირველი, რასაც უნდა ველოდოთ, იქნება დებატები და რეზოლუციის პროექტი ევროპარლამენტში. მარტის თვეში უკვე ევროპარალმენტში დაგეგმილი იყო საქართველოსთან დაკავშირებით განხილვა და მომზადებულიც იყო რეზოლუციის პროექტი, მაგრამ ეს პროცესი გადავადდა. ახლა კი, როცა სიტუაცია დარეგულირდება, ევროდეპუტატები ამ საკითხს აუცილებლად დაუბრუნდებიან. თუ იმ დროისთვის არ იქნა შესრულებული 8 მარტის შეთანხმების ორივე პუნქტი, უნდა ველოდოთ, რომ რეზოლუციის პროექტი გაცილებით უფრო მწვავე იქნება, ვიდრე იყო დაგეგმილი. 

„ფორმულას“ ინფორმაციით, 8 მარტის შეთანხმებაზე მმართველი გუნდის წევრების განცხადებაზე აპირებენ თავიანთი პოზიცია დააფიქსირონ სხვა ევროდეპუტატებმაც. 

შეგახსენებთ, რომ ევროპარლამენტარმა მაიკლ გალერმა რვა მარტის შეთანხმების შესრულებისა და პოლიტპატიმრების გათავისუფლებისკენ „ქართულ ოცნებას“ სოციალურ ქსელში გავრცელებული განცხადებით მოუწოდა.

გარდა ამისა, ევროპარლამენტარმა ვიოლა ვონ კრამონმა წერილი გაავრცელა, სადაც აცხადებს, რომ პანდემიას მმართველი გუნდი საკუთარი ინტერესებისთვის იყენებს.

რვა მარტის შეთანხმების შესრულებისკენ მმართველ ძალას საქართველოში მოქმედმა დიპლომატიური კორპუსის წარმომადგენლებმა ერთიანი წერილით მოუწოდეს. შეთანხმების შესრულების აუცილებლობაზე გააკეთა განცხადება ადამ კინზინგერმაც, ხოლო აშშ-ის სენატის საგარეო ურთიერთობათა კომიტეტის თავმჯდომარემ, ჯიმ რიშმა მოუწოდა ხელისუფლებას, გაათავისუფლონ პოლიტიკური პატიმრები.

 საარჩევნო შეთანხმება ოპოზიციასა და ხელისუფლებას შორის: 

 საპარლამენტო არჩევნების გამართვა 2020 წლის ოქტომბერში იგეგმება. იქამდე კი პარლამენტში კონსტიტუციაში შესატან ცვლილებეზე უნდა იმსჯელონ – კერძოდ, არჩევნები მანდატების 120/30 გადანაწილებით ჩატარდება, ხოლო ბარიერი 1%-იანი იქნება. ამის შესახებ მმართველ გუნდსა და ოპოზიციას შორის შეთანხმება, დიპლომატიური კორპუსისა და საერთაშორისო თანამეგობრობის ჩართულობით, 8 მარტს მოხდა.

რამდენიმე დღის წინ ევროპარლამენტარმა ანდრიუს კუბილიუსმა საქართველოს მთავრობას ოპოზიციასთან მიღწეული შეთანხმების პირობების შესრულებისკენ მოუწოდა. მან სოციალურ ქსელში კრიტიკული წერილი გამოაქვეყნა საქართველოს პრეზიდენტის, პრემიერ-მინისტრისა და პარლამენტის თავმჯდომარის სახელზე. 

მოგვიანებით, პრემიერ-ინისტრმა გიორგი გახარიამ რამდენიმე დღის წინ ანდრიუს კუბილიუსის წერილთან დაკავშირებით, განაცხადა, რომ საქართველოში პოლიტპატიმრები არ არსებობენ, წერტილი!“ 
გიორგი გახარიას თქმით, ხელისუფლება დადებულ პირობას შეასრულებს.

გარდა ამისა, ბრიფინგზე, პარლამენტის თავმჯდომარე არჩილ თალაკვაძემ განაცხადა, რომ თუ საარჩევნო სისტემასთან დაკავშირებით საკონსტიტუციო ცვლილებები ჩავარდება, პასუხისმგებლობა ოპოზიციას დაეკისრება. მანვე აღნიშნა, რომ დაპატიმრებული პოლიტიკოსების გათავისუფლებასთან დაკავშირებით 8 მარტის შეთანხმებაში არაფერი წერია.  

0Shares
infonews.ge

კომენტარები

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

Seo wordpress plugin by www.seowizard.org.