2020 წლის 11 ოქტომბერი ქართული MMA-ის ისტორიაში სამუდამოდ ჩაიწერა – სწორედ ამ დღეს, აბუ დაბის საბრძოლო კუნძულზე UFC Fight Night 179 გაიმართა და ღონისძიების ფარგლებში, ერთბაშად ორი ქართველი ტრიუმფალურად გამოვიდა.
ჯერ გიგა ჭიკაძემ დაიკავა ოქტაგონი და UFC-ში ოთხიდან ოთხი გამარჯვება ჩაიწერა, ხოლო შემდეგ, მეინ ივენთზე 23 წლის დებიუტანტმა, შერეულ საბრძოლო ხელოვნებაში დაუმარცხებელმა, ილია თოფურიამ სახელოვანი მაროკოელი – იუსუფ ზალალი დაამარცხა.
აქამდე, მსოფლიოს ყველაზე პრესტიჟულ პრომოუშენში ორ ქართველს ერთი ღონისძიების ფარგლებში არასოდეს გაუმარჯვია და ცხადია, ჩვენიანების წარმატებულმა გამოსვლამ, UFC-შიც და საზოგადოდაც, საქართველოს კიდევ უფრო შორს გაუთქვა სახელი.
ასეც უნდა ყოფილიყო… როცა საბრძოლო სახეობაში ერთი ქვეყნის წარმომადგენლებისგან ამხელა წარმატებას უყურებ, სურვილი გიჩნდება, რომ მათ შესახებ უფრო მეტი იცოდე.
ხოდა, BJ Penn როგორი ავტორიტეტული გამოცემაა MMA-ის სამყაროში, თქვენც მოგეხსენებათ… მისმა ერთ-ერთმა ავტორმა, იტალიელმა ალფრედო ძულინომ სოციალურ ქსელ Twitter-ზე საინტერესო მოცემულობაზე დაწერა:
”საქართველოს, ქვეყანას, რომლის მოსახლეობაც 4 მილიონია [3,716,900], UFC-ში მეტი (6) მებრძოლი ჰყავს, ვიდრე:
- იტალიას – 60 მილიონი, 2 მებრძოლი;
- არგენტინას – 45 მილიონი, 3 მებრძოლი;
- იაპონიას – 125 მილიონი, 4 მებრძოლი;
- ნიდერლანდებს – 17 მილიონი, 3 მებრძოლი;
- ჩეხეთს – 10 მილიონი, 3 მებრძოლი;
- საბერძნეთს – 10 მილიონი, 1 მებრძოლი”.
UFC-ში ექვსი მებრძოლი ხო კარგია და adjarasport.com-ის ინფორმაციით, წლის ბოლომდე, სულ მცირე, ერთი ქართველი კიდევ შეგვემატება!
ასე რომ, დავტკბეთ ყველა ქართველის ჩხუბით adjarasport.tv-ზე და სამომავლოდ, საჩემპიონო ქამრის იმედებიც გვქონდეს…
წყარო: adjarasport.com
