10 აპრილიდან სრულფასოვნად ამოქმედდება ევროკავშირის შესვლა/გამოსვლის ახალი სისტემა (EES), რომელიც 2025 წლის 12 ოქტომბრიდან მუშაობს, პროგრესულად გავრცელდება ევროპის 29 ქვეყანაში: შენგენის 25 სახელმწიფოში, ისლანდიაში, ნორვეგიაში, შვეიცარიასა და ლიხტენშტეინში.
ეს სისტემა მოკლევადიანი მოგზაურობისას არაევროკავშირის ქვეყნების მოქალაქეების შესვლის, გამოსვლისა და შესვლაზე უარის თქმაზე ციფრული მონაცემებით ჩაანაცვლებს პასპორტებში ბეჭდის ჩარტყმის პროცედურას. ციფრულად აღიწერება მგზავრების სახის გამოსახულება, თითის ანაბეჭდები და პერსონალური ინფორმაცია მისი სამგზავრო დოკუმენტიდან.
მას შემდეგ, რაც EES-ი ამოქმედდა, აღირიცხა საზღვრის კვეთის (შესვლა/გამოსვლა) 45 მილიონზე მეტი შემთხვევა. 240 ათასზე მეტ პირს სხვადასხვა მიზეზით უარი ეთქვა შენგენის ზონის ქვეყნებში შესვლაზე. მიზეზთა შორის იყო: ვიზიტის არასათანადო დასაბუთება, ვადაგასული ან ყალბი დოკუმენტები. სისტემამ გამოავლინა 600-ზე მეტი პირი, რომელიც საფრთხეს წარმოადგენს ევროპისთვის. მათ უარი ეთქვათ შეშვებაზე და მათი მონაცემები სისტემაში ჩაიწერა. შედეგად, თუ ასეთი პირები შეეცდებიან ევროპის სხვა ქვეყანაში შევლას, სასაზღვრო სამსახურები დაინახავენ მისთვის უარის თქმის შესახებ ჩანაწერს.
EES-ით შეგროვებული ბიომეტრიული მონაცემების დახმარებით, ამიერიდან უფრო მარტივად იქნება შესაძლებელი პირადი მონაცემების გაყალბების გამოვლენა. თითოეული ქვეყნის საზღვრის გადაკვეთისას, პირის თითის ანაბეჭდები და სახის გამოსახულება შედარდება სისტემაში შენახულ ბიომეტრიულ მონაცემებს.
