მიქაუტაძე, მამარდაშვილი და კვარაცხელია მსოფლიოს იპყრობენ – საქართველოს ეროვნული საფეხბურთო ნაკრების სამი ფეხბურთელი სატრანსფერო ბაზარზე ლიონელ მესისა და კრიშტიანუ რონალდუსაც კი უსწრებენ.
მსოფლიო ფეხბურთის ლეგენდებზე მეტად, მსოფლიო ფეხბურთის გრანდები ახლა ქართული ფეხბურთის ვარსკვლავებით დაინტერესდნენ, რაც იძლევა იმის წინაპირობას, რომ ევროპის ჩემპიონატის შემდეგ, მათი საბაზრო ღირებულება კიდევ უფრო გაიზრდება.
ჩვენ მოვიგეთ – ზღაპარი გრძელდება. დღეს სახალხო ზეიმის დღეა. საქართველოს ეროვნული ნაკრები ევროპის ჩემპიონატის მერვედ ფინალშია. ქართველმა ფეხბურთელებმა სასწაული შეძლეს. მინიმალური შანსი ბოლომდე გამოიყენეს, პორტუგალიელების უძლეველობის მითი დაამსხვრიეს და თამაში გამანადგურებელი ანგარიშით დაასრულეს.
საქართველოს ნაკრებმა აუფ შალკეს მოედანზე დაამარცხა გუნდი, რომელიც წლების წინ ევროპის ჩემპიონი გახდა. თამაშის დაწყებიდან რამდენიმე წუთში ხვიჩა კვარაცხელიას გახსნილი ანგარიშით და გიორგი მიქაუტაძის ზუსტად შესრულებული 11-მეტრიანი დარტყმით ახალი ისტორია დაიწერა. ეროვნული ნაკრები ახლა ახალი ბრძოლისთვის ემზადება. მეტოქე კიდევ უფრო ძლიერი, ესპანეთი იქნება. თამაში კიოლნში, 30 ივნისს გაიმართება.
