უკრაინამ ამერიკის შეერთებულ შტატებთან დაიწყო მოლაპარაკება უსაფრთხოების გარანტიების ორმხრივ შეთანხმებაზე.
უკრაინის დელეგაციას პრეზიდენტის ოფისის უფროსი ანდრი ერმაკი ხელმძღვანელობს. მისი განცხადებით, სიმბოლურია, რომ უკრაინის უდიდესი სტრატეგიული პარტნიორი აშშ-ია პირველი სახელმწიფო, რომელთანაც უკრაინამ ეს პროცესი დაიწყო.
უკრაინის დახმარების და უსაფრთხოების გარანტიების დეკლარაციას 2023 წლის ივლისში, ნატოს ვილნიუსის სამიტის ფარგლებში მოაწერეს ხელი „დიდი შვიდეულის“ წევრი სახელმწიფოების: აშშ-ის, დიდი ბრიტანეთის, გერმანიის, საფრანგეთის, იტალიის, კანადის და იაპონიის ლიდერებმა.
3 აგვისტოს, ღამით, ამერიკის შეერთებულ შტატებთან მოლაპარაკების პროცესის დაწყების შემდეგ, უკრაინის პრეზიდენტის ოფისში განაცხადეს, რომ უსაფრთხოების გარანტიები გააძლიერებს უკრაინის პროგრესს ნატოსა და ევროკავშირში გაწევრიანების გზაზე, რაც საბოლოო მიზანი და უსაფრთხოების ყველაზე საიმედო გარანტიაა.
წყარო: radiotavisupleba.ge
