EuroNews Payroll-ის და Moorepay-ის ჩატარებულ კვლევას აქვეყნებს, რომელიც იკვლევს, რამდენად ფარავს სახელმწიფო პენსია ცხოვრების საჭირო ხარჯებს ევროპის ქვეყნებში.
კვლევის მიხედვით, 39 ევროპული ქვეყნიდან 20-ში პენსია ცხოვრების ხარჯების დასაფარად საკმარისი არ არის — საქართველოში კი ის ცხოვრების საჭირო ხარჯების მხოლოდ 22%-ს ფარავს, რაც ყველაზე დაბალი მაჩვენებელია ევროპაში.
კვლევის მიხედვით, ჩრდილოეთ და დასავლეთ ევროპის ქვეყნებში პენსია ხშირად საკმარისია ძირითადი ხარჯების დასაფარად, მაშინ როცა აღმოსავლეთ ევროპის და ბალკანეთის ქვეყნებში ის ხშირად არასაკმარისია.
“ყველაზე დაბალი დაფარვა, 22% საქართველოშია. ყველაზე მაღალი, 225% ლუქსემბურგში, სადაც საშუალო პენსია €28790-ია, ხოლო ცხოვრების ხარჯები €12,791-ს შეადგენს, ანუ პენსია თითქმის ორჯერ აღემატება საჭიროებას.
პენსია სიცოცხლისთვის საჭირო ხარჯების ორჯერ აღემატება ასევე იტალიაში (210%) და ფინეთში (208%), ესპანეთსა (199%) და დანიაში (189%) კი ახლოსაა ამ ნიშნულთან,” — ვკითხულობთ კვლევაში.
150–180%-იან ნიშნულზეა პენსია — ისლანდიაში (179%), ნორვეგიაში (178%), გერმანიაში (176%), ბელგიაში (170%), ავსტრიაში (165%), საფრანგეთში (160%), ნიდერლანდებში (159%) და შვედეთში (158%).
100–150%-ის ფარგლებშია: შვეიცარია (131%), ირლანდია (126%), დიდი ბრიტანეთი (120%), პოლონეთი (112%), ჩეხეთი (108%) და საბერძნეთი (103%) — აქ პენსია საკმარისია, მაგრამ მხოლოდ მცირე ზედმეტი თანხა რჩება.
პენსიები არ არის საკმარისი 20 ქვეყანაში. ზოგიერთ მათგანში ისინი ჯერ კიდევ ფარავს საჭირო თანხების 80%-ზე მეტს. ეს ქვეყნებია: სლოვენია (95%), სლოვაკეთი (94%), ესტონეთი (91%), პორტუგალია (90%), მონტენეგრო (89%), ლიტვა (85%), ხორვატია (82%) და უნგრეთი (81%).
თუმცა, პრობლემური სიტუაციაა ბევრ ქვეყანაში, სადაც პენსია მხოლოდ 65%-ზე ნაკლებ ხარჯებს ფარავს. ეს ქვეყნებია: ალბანეთი (29%), უკრაინა (29%), მოლდოვა (42%), ბოსნია და ჰერცეგოვინა (53%), კვიპროსი (58%), ჩრდილეთ მაკედონია (61%), თურქეთი (64%), ლატვია (65%).
კვლევის დასკვნაში ვკითხულობთ, რომ მოხუცები ძირითადად პენსიაზე არიან დამოკიდებული. OECD-ის მონაცემებით, 65 წლის და უფროსი ასაკის ადამიანების შემოსავლის 66% საჯარო ტრანსფერებიდან მოდის. ზოგი ქვეყანა იყენებს კერძო სამუშაო პენსიასაც.
