აშშ-ის კონგრესის სენატმა უკრაინის მხარდამჭერი რეზოლუცია მიიღო. სენატორები აშშ-ის პრეზიდენტს, ჯო ბაიდენს მოუწოდებენ, რუსეთს მნიშვნელოვანი სანქციები დააკისროს, თუ ის უკრაინაში შეიჭრება.
სენატორები ხაზგასმით აღნიშნავენ, რომ თუ ადგილი ექნება უკრაინაში შეჭრას ან უკრაინის სუვერენიტეტის შელახვას რუსეთის მხრიდან, აშშ-ის მთავრობამ უნდა გამოიყენოს მის ხელთ არსებული ინსტრუმენტები, რათა მნიშვნელოვანი შედეგები დააკისროს რუსეთის ფედერაციას.
რეზოლუციაში ნათქვამია, რომ რუსეთის მიერ უკრაინის საზღვართან 150 000-ზე მეტი ჯარისკაცის დაგროვება საფრთხეს უქმნის მოსაზღვრე ნატოს მოკავშირეების უსაფრთხოებას და პროვოკაციული და უგუნური ნაბიჯია, რომელიც ეწინააღმდეგება დადგენილ საერთაშორისო ნორმებს.
სენატორები ადასტურებენ აშშ-ის ურყევ ვალდებულებას მხარი დაუჭიროს უკრაინის მთავრობის ძალისხმევას მისი ტერიტორიული მთლიანობის აღსადგენად პოლიტიკური, დიპლომატიური და სამხედრო მხარდაჭერის გზით.
რეზოლუციის ტექსტში ასევე აღნიშნულია, რომ რეზოლუცია არ უნდა იყოს ინტერპრეტირებული როგორც რუსეთის წინააღმდეგ სამხედრო ძალის გამოყენების ან უკრაინაში აშშ-ის ძალების გაგზავნის ავტორიზაცია.
