ტექნოლოგიურმა გიგანტმა Apple-მა 2023 წლის პირველი პროდუქტი წარადგინა. მან მომხმარებლებს უფრო სწრაფი მაღალი კლასის Macbook pro-ს ლეპტოპები და Mac mini-ის დესკტოპ ვერსია შესთავაზა.
ახალი 14 და 16-დიუმიანი MacBook Pro-ები ისევე გამოიყურება, როგორც წინა – 2021 წლის მოდელები, მაგრამ M1 Pro და M1 Max პროცესორები ჩანაცვლებულია უფრო მძლავრი M2 Pro და M2 Max ჩიპებით.
Apple-მა M2 ჩიპი პირველად გასულ წელს MacBook Air-სა და დაბალი კლასის MacBook Pro-ში გამოიყენა.
ახალი Mac-ებით კომპანია აძლიერებს პროდუქციის ხაზს, რომელმაც შარშან კომპანიას მოუტანა $40,2 მილიარდი, რაც ტექნიკური გიგანტის შემოსავლის 10%-ზე მეტს შეადგენს.
კომპანია ასევე გეგმავს წლის ბოლოსთვის M2 ჩიპის ვარიაციის გამოყენებას მაღალი დონის Mac Pro დესკტოპ კომპიუტერზე. Apple ასევე მუშაობს MacBook Air-ის ახალ ვერსიებზე, მათ შორისაა უფრო დიდი – 15 დიუმიანი მოდელები.
განახლებული 14 დიუმიანი MacBook Pro-ის ფასი $1999-დან იწყება, ხოლო 16 დიუმიანი ვერსიის ფასი $2499-ია. Mac mini წინა ვერსიასთან შედარებით, $100-ით ნაკლები – $599 ღირს. Apple-ის განცხადებით, ყველა ახალი Mac-ის მიწოდება 24 იანვარს დაიწყება.
ნიუ-იორკში ვაჭრობაში Apple-ის აქციების ფასი 1%-ზე ნაკლებით გაიზარდა და $135,94 შეადგინა.
