აშშ-ს და საფრანგეთის პრეზიდენტები „ქართულ ოცნებას“ მოუწოდებენ, რომ პატივი სცენ საზოგადოების სურვილებს ევროატლანტიკურ გზაზე დაბრუნებით.
განცხადებაში აღნიშნულია, რომ აშშ და საფრანგეთი ადასტურებენ თავიანთ ერთგულებას და დგანან ქართველი ხალხის გვერდით მათ ევროატლანტიკურ მისწრაფებებში.
ჯო ბაიდენი საფრანგეთს ნორმანდიაში მოკავშირეთა ჯარების გადასხდომის მე-80 წლისთავისადმი მიძღვნილ ღონისძიებებზე დასასწრებად სტუმრობდა. აღნიშნული ვიზიტისას აშშ-ს პრეზიდენტმა შეხვედრა გამართა ფრანგ კოლეგასთან, სადაც სხვადასხვა გლობალურ საკითხზე ისაუბრეს. თეთრი სახლის მიერ გავრცელებული განცხადების თანახმად, საუბარი შეეხო საქართველოსაც.
„შეერთებული შტატები და საფრანგეთი მხარს უჭერენ სამხრეთ კავკასიაში სამართლიანი და ხანგრძლივი მშვიდობის დამყარებას, რომელიც დაფუძნებულია საერთაშორისო სამართლის პატივისცემაზე, ასევე სუვერენიტეტის, საზღვრების ხელშეუხებლობისა და ტერიტორიული მთლიანობის პრინციპებზე. ისინი მხარს უჭერენ შემდგომ რეგიონულ ინტეგრაციას სამხრეთ კავკასიაში ყველა რეგიონის საკეთილდღეოდ“, – აღნიშნულია თეთრი სახლის მიერ გავრცელებულ განცხადებაში.
